ഇനി ഞാനുറങ്ങട്ടെ...

പകൽവറ്റി വീണ്ടും-
ഇരവ് പടർന്നു
രാപക്ഷിതൻ പാട്ടുമുറങ്ങി ...

ഇനി ഞാനുറങ്ങട്ടെ -
കുടഞ്ഞെറിഞ്ഞൊരാ ബന്ധങ്ങൾക്ക്‌
മറവിലായി തലചായ്ച്ചുറങ്ങട്ടെ ...

വീഥിയടഞ്ഞ ജീവിത-
യാത്രയിൽ തനിച്ചായി
ഇരുട്ടിൽ, പഥികൻ ഞാൻ ..

വിസ്മൃതിയിലാഴ്ന്ന-
പകലുകളെ നിനച്ചു,
ഹൃത്തിൽ വേദന വിളയാടുമ്പോൾ...

ഭാണ്ഡമൊഴിയാത്ത എന്റെ-
ശാന്തിയും മുക്തിയും തേടി
തളർന്നു പോയൊരെൻ
നിദ്രകളെ തലോടി ....

ഇരുളിൻ , ദുരന്തത്തിൽ -
രാവ് തരാത്തൊരു തരിവെട്ടത്തിനായി
കേഴാതെ, ഇനി ഞാനുറങ്ങട്ടെ...