വാക്ക് ...

ഒരു വാക്കിനായിക്കാത്തിരു-

ന്നെന്റെ കാഴ്ചകൾ കറുത്തതും 

ഓർമ്മകൾ വിയർത്തൊലിച്ചൊരു 

പടവിലൊറ്റക്കിരുന്നതും..

കൂട്ടിനായി , കുഞ്ഞുകാറ്റായി..

ഹൃത്തിൽക്കിനാവുകൾ വരിപൂണ്ടതും

നാൾ വഴികളിലും 

നട വഴികളിലും

ഞാനെന്തേ തിരഞ്ഞുവന്നു 

വീണ്ടുമൊരു വാക്കിനായി മാത്രം..

കനവായിരുന്നു നീ ..

നിശ്ചലം നിൽക്കുന്ന സ്‌മൃതി-

ച്ചോപ്പായിരുന്നു നീ...

എന്നാലുമെൻ തനുസ്‌പന്ദനം നിലക്കാത്ത

ഇരുൾവള്ളികളിൽ ജലകരങ്ങളേറ്റു-

വാങ്ങി നീ കരുണയായി കരഞ്ഞീ-

ടുമ്പോൾ, നിമിഷനേരത്തിൽ ഞാനൊരു 

വാക്കായി നിന്നിലേക്ക്‌ മടങ്ങുന്നു 

വീണ്ടും വരുമെന്നൊരു 

വാക്കായി മടങ്ങുന്നു...